Por non dispór dunha conta bancaria

Mediante unha notificación certificada baseada nuns supostos ‘fundamentos de dereito’, asinada polo director provincial da Coruña Ánxo M. Teijeiro Fraga, o receptor dunha pensión de 426 euros deixará de percibila de non aportar unha conta bancaria.

MCC, de 60 anos, que vén percibindo a prestación dende 2003 mediante recibo, é requirido agora polo Servizo Público de Emprego para que aporte unha conta bancaria ou quedará sen prestación. O director provincial Ánxo M. Teijeiro recorre ao Texto Refundido da Lei Xeral da Seguridade Social, aprobado en 1994. O perceptor da miúda pensión comezou a cobrar en 2003 sen facilitar conta bancaria ningunha, dado que non a tiña. A oficina concedeulle a prestación mediante recibo ata a actualidade.

De socato, a dirección provincial do Ministerio de Traballo e Emigración, oficina de Alexandre Barreiro Noya, 1-3, da Coruña, pese aos usos e costumes adquiridos polo perceptor, castígao a «cursar baixa na prestación ata que aporte os datos bancarios requiridos».