Centro Galego de Artes da Imaxe ||| A Coruña

 

Somos acó (2013), de Roi Carballido e Seném Outeiro, documental de 32 minutos que denuncia o sufrimento das familias do rural galego polo desmantelamento das escolas públicas por parte da Administración. Mostra tamén a esperanza e a loita destas familias en defensa do rural como medio para desenvolver unha vida digna e con futuro.

Rodado no verán de 2012 na montaña luguesa e na capital compostelá, este documento é froito da colaboración entre Fílmika Galaika e varios colectivos afectados pola irresponsabilidade política. A banda sonora corresponde ao grupo Quempallou.

Lume de fachós (2013), de Roi Carballido (produción) e Seném Outeiro (dirección e montaxe), metraxe de 32 minutos, pretende mostrar a ‘Festa dos fachóns’ de Castro Caldelas (Ourense), recordada pola súa poboación como reflexo do seu acervo cultural, talvez proposta a considerar como valor das actuacións tradicionais, a piques de desaparecer en Galiza. O documental recibiu a axuda do Concello de Castro Caldelas.

Ínsula (2012), de Roi Carballido (produción) e Senén Outeiro (guión e dirección), mediametraxe de 21 minutos, contou no elenco principal cos actores Xavier Estévez, Luís Iglesias e a actriz Antía Otero, e fotografía de Berto Palacios.

O filme propón o retorno da guerra de Cuba do tenente Álvaro de Souto-Maior, que arriba ferido á illa. Coñece ao capitán Ernesto O’Donell, que será o seu guía. Con todo, a súa saúde levarao a un tránsito singular. A distribución da cinta é responsabilidade de Amén Cinema.

Será o sábado 27 de abril de 2013, contra as seis do serán, no Centro Galego de Artes da Imaxe (CGAI), na Coruña (rúa Rúa Durán Loriga, 10 baixo). 

Proxección no Castelo de Castro Caldelas

Na véspera doutra edición da Festa dos Fachos de Castro Caldelas (Ourense), Fílmica Galaika presenta o vindeiro venres (día 18 de xaneiro de 2013), contra as oito do serán, o seu traballo ‘Lume de fachos’. Será no castelo de Castro Caldelas.

‘Lume de fachos’ pretende descubrir «dende unha perspectiva antropolóxica» unha das moitas festas tradicionais galegas, neste caso a Festa dos Fachos, que data do ano 1753. Parece que a súa orixe débese á peste que azoutou a comarca de Caldelas. A veciñanza, como función desinfectante, considerou a utilización dos fachos para loitar contra a peste. Fálase tamén de alucinacións, de que algúns veciños «viron a Deus, que lles comunicou que a peste remitiría de lle erixir un altar a San Sebastián. Cousa que parece que fixeron e a peste parou». De aí vén o día dos fachos. Tratábase dunha celebración moi masculina: só participaban homes.

Na actualidade, ademais da produción dos 400 fachos (sementados, segados e mallados polos propios veciños ao estilo tradicional), os organizadores da festa prometen 4.000 chourizos e 500 litros de viño.

O documental ‘Lume de fachos’ foi dirixido por Seném Outeiro e producido por Roi Carballido.

Imaxe de FÍLMIKA GALAIKA

'Ínsula' /// Fílmika Galaika

No incomparable marco da illa de San Simón (Redondela, Pontevedra) presentouse o pasado sábado a curtametraxe Ínsula, da produtora coruñesa Fílmika Galaika. Alí estiveron practicamente todos os que participaron no proxecto, agás Mini (e o adestrador do can).

No argumento de Ínsula (subvencionada por Agadic e Concello de Redondela), o tenente Álvaro de Souto-Maior (Xavier Estevez) «regresa ferido de Ultramar a un hospital de oficiais situado nunha misteriosa illa».A imaxe dunha traíña 'conducida' por un enigmático persoeiro (Mini) inicia a secuencia. Logo dos especiais coidados do doutor (Miro Casabella) e da enfermeira (Antía Otero) e da escoita dos monólogos do seu superior (Suso Pando), o convalecente tenente espertará totalmente curado e abandonado, o que propiciará a súa penúltima decisión.

Trátase dunha montaxe de carácter surrealista, ben definida e coidada, rodada en setembro de 2011 na illa de San Simón e no convento de Vilavella, tamén en Redondela.

Seném Outeiro (director), Roi Carballido (produción executiva), Berto Palacios (director de fotografía), Iván Ogando (son), Maria Villas (directora de arte e vestiario), María Illobre (caracterización) e Alberte Hortas (maquillaxe) conforman o cadro técnico de Ínsula.